Daşkent türkmen prezidentine garaşýar

2009-njy ýylda Türkmenistandan Hytaýa tarap açylan gazgeçiriji Özbegistanyň üstünden geçýär.

Türkmenistanyň Prezidenti Gurbanguly Berdimuhamedowyň öňümizdäki günlerde goňşy Özbegistana sapar etmegine garaşylýar. Şu mynasybetli, ýakynda özbek prezidenti Islam Karimow öz türkmen kärdeşine hat ýollady.

Türkmenistanyň Garaşsyzlygynyň 2 ýyllygyna gabatlanyp iberilen hatda prezident Islam Karimow bu saparyň iki ýurduň arasyndaky özara we köptaraplaýyn gatnaşyklaryň güýçlendirilmegine itergi berjegini aýtdy.

Aşgabat we Daşkent dürli pudaklar boýunça ikitaraplaýyn maýa goýumlary we özara taslamalary durmuşa geçirmegiň ýollaryny agtarýar. Duldegşir goňşular özara söwda dolanşygyny $1 milliarda çykarmagy meýilleşdirýärler.

Türkmenistan we Özbegistan goňşy Owganystan, Aral deňzi we Amyderýa ýaly meseleler boýunça ýygy-ýygydan maslahat geçirýär. Öňümizdäki saparyň dowamynda özara serhet gatnawlarynyň hem maslahat edilmegine garaşylýar. Türkmen-özbek serhediniň uzynlygy 1,620 kilometre barabardyr.

Özbegistanda 160 müňden gowrak etniki türkmen ýaşaýar. Ýurtda 50-den gowrak mekdepde türkmen dilinde sapak geçilýär. Türkmen diasporasy esasan Horezm, Surhanderýa we Garagalpagystan regionlarynda ýaşaýar.

Türkmenistan bilen Özbegistany birnäçe iri taslamalar baglanyşdyrýar. 2009-njy ýylda Türkmenistandan Hytaýa tarap açylan gazgeçiriji Özbegistanyň üstünden geçýär. Taraplar Merkezi Aziýany Pars aýlagy ýurtlary bilen birikdirjek demirýol taslamasy boýunça hem pikir alşyp gelýärler.