Hytaý elektron söweşçileri türgenleşdirýär

Kiberhowpsuzlyk ABŞ üçin esasy meseleleriň biri bolmagynda galýar. (IMPACT, CC BY-SA 3.0)

Hytaýyň döwlet habar agentligi indiki aý ýurduň harby güýçleriniň täze söweş usullaryny, şol sanda elektron tehnologiýalaryny ulanýan bölümleri synagdan geçirjegini aýdýar.

Çarşenbe güni “Ksinhua” habar agentligi Hytaýyň ilkinji gezek “informatizasiýa söweşinde” ulanyljak elektron güýçlere ünsi gönükdirjekdigini habar berdi.

Bu aralykda, ABŞ-nyň prezidenti Barak Obamanyň indiki hepde Hytaýyň prezidenti Ksi Jiňpiň bilen kiderhowpsuzlyk barada gepleşik geçirmegine garaşylýar. Mundan öň Amerikanyň möhüm harby sistemalaryna kiberhüjüm edilendigi barada habar berlipdi.

Birleşen Ştatlaryň resmileri bu soňky habarlar barada hiç zat aýtmadylar, emma Ak Tamyň metbugat wekili Jeý Karneý prezident Obama Kaliforniýada prezident Ksi bilen duşuşanda kiberhowpsuzlygyň mashalat ediljeginiň anykdygyny mälim etdi. Karneý bu meseläniň administrasiýa üçin “esasy gaýgydygyny”, Hytaýyň resmileri bilen duşuşyklarda onuň her gezek gozgalýandygyny aýtdy.

Duşenbe güni “Waşington Post” gazeti Hytaýyň internet içalylaryny ABŞ-nyň iň ynjyk we ösen ýarag sistemalarynyň käbirine degmekde günäkärleýän harby hasabatyň bir bölegini çap etdi. Emma Hytaý hakerlik synanyşyklaryna gatnaşygyny düýbünden inkär edýär. Üstesine, ol bu aýyplamalara jogap edip, ABŞ-da ýerleşýän hakerleriň Hytaýyň birnäçe harby websaýtlaryna hüjüm edendigini öňe sürdi.

Harby hasabatda hakerleriň hüjüm eden ýarag dizaýnlarynyň arasyna “Patriot” raketadan goranyş sistemasynyň, “Aegis” ballistik raketadan goranyş sistemasynyň hem girýändigi aýdylýar. F/A-18 söweş uçarlary, “Black Hawk” dikuçary we F-35 hüjümçi uçarlar ýaly möhüm harby uçarlar we gämiler hem nyşana alnan enjamlaryň arasynda agzalýar.