Kerri bilen Lawrow Siriýa babatda dil tapyşmaga çalyşýar
0
Kerri Lawrow sişenbe güni Berlinde gepleşik geçirdi. (Foto: Döwlet departamenti)
Birleşen Ştatlaryň Döwlet sekretary Jon Kerri bilen Russiýanyň daşary işler ministri Sergeý Lawrow sişenbe güni Berlinde gepleşik geçirip, Siriýadaky graždanlyk urşy we beýleki meseleler boýunça dil tapyşmaga çalyşdylar.
Lawrow Birleşen Ştatlary Siriýanyň oppozisiýasyna Damask bilen göni gepleşik geçirmek babatda basyş etmäge çagyrdy. Ol siriýalylaryň öz içerki meselelerini özleriniň çözmelidigini nygtady.
Duşenbe güni Britaniýanyň paýtagty Londona edýän saparynyň dowamynda Kerri has köp halkara goldawyna garaşýan Siriýa oppozisiýasynyň ýeliň ugruna öz başyna goýberilmejekdigini aýtdy.
London Kerriniň Ýewropa we Ýakyn Gündogara edýän saparynyň ilkinji duralgasy boldy. Ol Birleşen Ştatlaryň Döwlet sekretary wezipesine belleneni bäri ilkinji gezek daşary ýurtlara resmi sapar edýär.
Lawrow gepleşikleriň önjeýli bolandygyny aýtdy. Olar beýleki arap ýurtlaryndaky wakalar, Ýakyn Gündogar, Owganystan we Demirgazyk Koreýa bilen Eýranyň ýadro programmalary barada hem maslahatlaşypdyrlar.
Birleşen Milletler Guramasynyň çaklamalaryna görä, Siriýadaky çaknyşyklarda häzire çenli 70 müň adam heläk bolupdyr. Russiýa bolsa prezident Başar al-Assad bilen arasyny saklaýan az sanly ýurtlaryň biridir.
ABŞ-nyň baş diplomaty Kerri saparynyň dowamynda Fransiýada, Italiýada, Türkiýede, Müsürde, Saud Arabystanynda, Birleşen Arap Emirliklerinde we Katarda hem bolup, bu ýurtlaryň liderleri bilen gepleşik geçirer.
